Sa kada bagyong minarapado sa satuyang rona manunotaran ang katuninungan sa katahawan kaini, Ang Mata kan Bagyo, sa sarong istorya sa sakuya kan sakong mga lolohon, ugwang sarong bagyo na uminagi digdi sa kabikolan kan dekada setenta sa bistado asin dae malilingawan na ngaran na Sening (Oct 1970), na base sa mga naisurat iyo ang pinakamakusog na bagyo na uminagi sa bikol kaitong panahon bago ang matrahedyang Rosing (Dec 2006) na iyo man an sakuyang naabutan na pinakamakusog, asin sigun sa pag-asa iyo ang pinakamakusog na bagyo sa tanang buhay kan institusyon. Sinasabing ang Sening ang nagpahiling sa mga bikolano kang panahon kun gurano katuninong ang Mata kan Bagyo, ang sabi ngani kaiyan sa istorya sa samuya, kadklan kan mga tawo naglilinig na kan saindang natad, nag-papakaray na kan mga danyos asin ang iba nagngingirit na ta tapos na ang peligro na sa pagtubod ninda uminagi na. Alagad bago pa man magkatarapos ang paglinig asin pag pakaray, ang bagyo na sa paghuna ninda naka-agi na, nagpamate giraray asin huminaloy pa ning halos sarong aldaw, dahilan para magkawsa ini ning labi labing danyos perwisyos, gutom, takot, kakulugan asin kagadanan sa nagkapira.
Ang sakuyang rason ta ako mapuon magsurat para sa sakuyang namomotan na banwaan, siring kan mata kan bagyo, na sa kada ko pag surat ilalaag ko ang sadiri ko sa tahaw kan bagyo, may tuninong na pag iisip hehilingon ang nakaagi asin aantisiparon ang paaboton. Mayo ako ning plano na maglinig ning natad, asin mag-pakaray kan mga danyos na dara kan bagyo, nunca man ako mangirit sa mga seryosong sitwasyon, alagad boot ko na mapangirit ang ibang tawo sa pagmawot na ini makakabulong nin kulog boot sa satuyang daghan. Ang sakong Obheto iyo ang maipahiling ang sitwasyon, makatao ning dikit na liwanag sa tahaw kan bagyo. Kadakol ang mga nangyayari sa palibot ta na dae kitang pakilabot, sa pagtubod ko maski dikit sana, makatabang ining sakong mga pagwawasiwas ning mga tataramon para maipahiling ang nagkakapirang epekto kan mga nangyayari sa satuyang rona. Dae ko masasabing gabos na maisusurat ko digdi gabos tama asin maray, alagad igagarantiya ko sa mga mabasa kaining blog na ini na ang maisusurat ko digdi totoo. Kun kamo may mahiling na sala, paki patanidan na sana ako, para satuyang maitama ang ano man na sala na maisusurat ko. Boot kong maging maray asin responsableng parasurat, asin hagafd ko sa mga para basa ang responsableng pagbasa, magkaigwa kita ning praktis sa pagiging responsable asin ini puunan ta sa sadit na bagay arog kaini, ta sabi ngani kaiyan, sa sadit man minapuon ang gabos na kadakulaan.
Maliban sa mga enot ko nang naipresentar na mga kadahilanan, ining sakong pagsurat bako man sana gabos manungod sa bagyo, saro sa mga nagtulod sako na magsurat iyo ang inspirasyon kang nagkapirang tawo sa kumunidad asin sa sakong personal na buhay. Ngunyan sa enot kong articulo boot kong ipaabot ang pasasalamat sainda, sa sakuyang pamilya, mga amigo asin amiga, mga paratukdo kan ako nag-ieskwela pa, sa sarong babayi na paminsan minsan kong masasambit sa mga masurunod kong articulo, asin sa sakuyang lolo na kakabalyo pa sana sa kagadanan, asin sa sarong pulitiko na minsan nang nagparaumdom satuya kan kamarayan, si Jesse "Pogi" Robredo. Sinda ang kabanga kan dahilan kung tano nagpuon ako magsurat. Asin huri sa mga rason na ini iyo ang pagkamoot sa literaturang bikolnon. Nahihiling ko na padikit dikit nang nawawara ang pagkamoot sa bikolnon na tataramon, kulang ang pagpromoter kaini sa publiko, su mga lumang kanta kan panahon dae ko na nadadangog na kinakanta kan mga kahubenan. Sa pagtubod na ang pagsurat sa lokal na tataramon makakatabang sa pag preserbar kan literatura, lalo na ang pag presentar kang mga ini sa mga masurunod na articulo.
Iyan ang mga kadahilanan kung tano nagpuon ang sakong pagsurat, ang pagwasiwas ning mga tataramon, na may kadikit na pagpangirit, pag-girumdom, pagtuyaw asin pag-omaw. Minsan ang sakuyang babaying namomotan nagsabi, dae kaipuhan kan sarong tawo na maging pulitiko para magserbi sa banwaan, ako tinamaan kan mga naitaram niya, ninghuli ta minsan naglaog sa isip ko na magpulitiko na lang para makatabang. Kaya sa ngunyan sakuyang lalakawon ang sarong parte kan pagtabang na dae naglalaog sa pulitika asin patunayan ang saiyang sinabi na mananggad dae ta gabos kaipuhan maglaog sa maateng kawat kan pulitika para lang makatabang.
Sa sakong panghuring mensahe, iwawalat ko ang paghagad kan pangadyi kan gabos na makakabasa kaini, na lugod matawan ako ning tamang pag-iisip na maiheras ang tamang mensahe para sa gabos. Sa tabang ning Dios asin ning mga amigo asin amiga sa ngunyan asin sa mga madadagdag pa. Lugod maging maray ining medya para sa kamarayan. Salamat sa pag-tino kan sakong blog, Dios Mabalos!
